Xalqaro valyuta fondi ekspertlari rasmiy axborotlarning ochiq-oshkoraligini o‘rganish uchun O‘zbekistonga keladi

28/12/2017 - 17:04 3059

O‘zbekistonda statistika axborotlarining maksimal darajada shaffofligini ta’minlash maqsadida xalqaro statistik tashkilotlar bilan hamkorlik kengaymoqda. 

Endilikda barcha mahalliy va xorijiy foydalanuvchilar uchun respublikaning ijtimoiy-iqtisodiy ko‘rsatkichlari real faktorlar asosida xalqaro amaliyotda qo‘llanilayotgan tizim orqali kuzatuv olib boriladi. Shu maqsadda Davlat statistika qo‘mitasi hamkor vazirlik va tashkilotlar bilan Xalqaro valyuta fondining kengaytirilgan Ma’lumotlarni tarqatishning umumiy tizimi (XVF k-MTUT) ga ulanish bo‘yicha ish olib bormoqda. 

O‘zbekiston tarqatayotgan rasmiy axborotlarning nechog‘lik ochiq-oshkoraligi, ma’lumotlarning haqqoniyligini kuzatish maqsadida Xalqaro valyuta fondi maxsus ekspertlar guruhining 2018 yil yanvar-fevral oylari yurtimizga tashrif buyurishi kutilmoqda. 

Bu haqda Davlat statistika qo‘mitasi xabar berdi.

Manba: O‘zA